Саудиски принц беше пронајден мртов во својата луксузна хотелска соба во Лондон минатиот ноември, а снимките од безбедносните камери подоцна потврдиле дека во часовите пред неговото тело да биде откриено, тој бил сам, беше кажано на истрагата.
Принцот Абдула бин Фахад бин Абдула бин Абдулазиз бин Џалави Ал Сауд (29) бил пронајден како лежи целосно облечен на подот од бањата во својот апартман на петтиот кат во хотелот „Мериот“.
Хотелскиот персонал насилно влегол во заклучената соба откако принцот не одговарал на повеќекратното тропање на вратата. На местото веднаш пристигнале обезбедувањето и екипи на итната медицинска помош, но не успеале да му го спасат животот.
Снимките од безбедносните камери, презентирани за време на истрагата, покажале дека принцот вечерта пред да биде пронајден излегол сам од хотелот за да запали цигара, а потоа мирно се вратил во својата соба.
Истражителите потврдиле дека никој друг не влегол во неговиот апартман во часовите пред неговата смрт.
Токсиколошките анализи откриле загрижувачки резултати. Концентрацијата на алкохол во неговата крв била речиси трипати поголема од дозволената граница за возење во Англија, ниво за кое судот слушнал дека само по себе можело да предизвика кома.
Освен алкохол, во неговиот организам биле пронајдени и потенцијално смртоносни количества на други супстанции.
Принцот Абдула се пријавил во хотелот во Кенсингтон на 19 ноември, планирајќи да остане една недела, но никогаш не го дочека крајот на престојот.
Истрагата покажала дека тој извесно време пред смртта се борел со злоупотреба на психоактивни супстанции.
Според „The Sun“, судскиот истражител заклучил дека нема докази кои би укажувале дека принцот имал намера да си го одземе животот.
Како официјална причина за смртта е наведена смрт како последица на несреќен случај („death by misadventure“), односно смртен исход што настанал поради ризично, но ненамерно однесување.
Саудискиот кралски двор официјално ја соопштил смртта на принцот Абдула на 2 декември. Погребната молитва била одржана во џамијата „Имам Турки бин Абдула“ во Ријад, во присуство на членови на кралското семејство и високи државни функционери.
