Потрошувачката на кокаин во Европа постојано се зголемува, покажува најновиот извештај на Француската опсерваторија за тенденции за дроги и зависност (OFDT).
Потрошувачката на кокаин порасна толку многу што сега претставува една третина од пазарот на наркотици во Европа, пишува Еурактив.
Претседателството со Советот на ЕУ пред два дена најави дека ќе се зајакне улогата на Европскиот мониторинг центар за дроги и зависности од дроги (ЕМЦДДА) за да може подобро да се справи со новите здравствени и безбедносни предизвици.
Како што е наведено, Франција е еден од најголемите корисници на кокаин во ЕУ, со 600.000 корисници годишно.
„Веќе неколку години сигналите покажуваат зголемена употреба на кокаин, без разлика на неговата форма (прав или кокаинска основа: крек)“, соопшти француската здравствена агенција Санте Публику Франс, која исто така учествуваше во извештајот.
Употребата на кокаин е зголемена кај возрасните, иако има „диверзификација на профилот на потрошувачите“ на кокаинот, кој традиционално се смета за дрога на богатите, а сега се користи од поширок дел од општеството.
Во исто време, потрошувачката кај младите се намалува.
Помеѓу 2000 и 2014 година, употребата на кокаин повеќе од тројно се зголемила кај 17-годишниците, но до 2022 година само 1,4 отсто некогаш користеле дрога.
Исто така, зголемен е и бројот на заплени на кокаин, па во 2022 година биле запленети 27,7 тони наспроти 10,8 тони во 2011 година.
Во периодот од 2010 до 2022 година, 23.335 лица завршиле во Итната помош по употреба на кокаин, додека само минатата година во просек неделно имало 72 приеми на итната медицинска помош.
„Повеќето од оние кои биле примени во собата за итни случаи по употреба на кокаин биле мажи (75 проценти), а средната возраст била 32 години, што одговара на профилите на општата популација која вообичаено најмногу користи кокаин“, се наведува во извештајот.
Поради зголемената побарувачка, одгледувањето на кока е зголемено во неколку земји во светот за дури 35 отсто, што е рекордно високо и најголемо зголемување на годишно ниво од 2016 година.
Извештајот, исто така, укажува дека во последниве години во Европа се појавиле нови центри за кокаин, особено преку Југоисточна Европа и пристаништата во Антверпен, Ротердам и Хамбург.
