После минато неделната тепачка за евтини кебапи во Лидл утринава нова трагикомична ситуација е снимена на камерата во маркетот Лидл во Лесковац, кога муштериите, главно пензионери, се испотепаа за свинска плешка од 400 динари на распродажба, пренесува порталот Решетка.
„Работата е што не само што беше евтин, туку беше ограничен на само три килограми. Оваа слика е тажна и покажува колку „добро“ всушност живееме“, коментира читателот кој го испрати видеото од „тепачката“.
Во второто видео, покрај грабањето за евтино месо, може да се видат и сцени како луѓето се борат меѓу себе со чадори.
Неодамна љубителите на ќебапи направија хаос во неколку продавници на Лидл во Србија, борејќи се да добијат пакети по ниска цена.
Здружените синдикати на Србија „Слога“ соопштија дека премиерката Ана Брнабиќ и Владата на Србија треба да поднесат оставки поради сериозната социјална нееднаквост, „евтин и мизерен живот“ што најдобро се илустрираше во ова.
„Тој настан не е воопшто смешен или забавен, како што е прикажан на социјалните мрежи, туку сериозно предупредување дека овој народ е подготвен да преземе очајнички мерки за да обезбеди храна по пониска цена, бидејќи таквиот гнев и очај ќе доведат до поголеми конфликти и насилство во иднина“, се наведува во соопштението.
