Министерката за образование и наука Весна Јаневска изјави дека е уверена оти наскоро ќе биде најдено решение за студентскиот оброк. Таа најави дека разговорите со студентските претставници продолжуваат, а денеска е предвидена и средба со премиерот и студентите.
– Имав средба со студентите, со претставници на студентските собранија на неколку универзитети, зборувавме за студентскиот оброк. Апсолутно сум сигурна дека ние решение ќе изнајдеме, но, гледам една мала дисонанца во континуитет на раководството на студентските собранија, а мислам дека не беа сосем доволно информирани за договорите што претходно сме ги имале со студентите и не сме имале никаков проблем во решавањето на студентскиот стандард и сите нивни потреби. Оттука, мислам дека сме блиску до изнаоѓање на решение – истакна министерката Јаневска, одговарајќи на новинарски прашања.
Точно е, рече Јаневска, дека побарале покачување.
– Јас не сум рекла дека тие никогаш не побарале, побараа покачување со тоа што ние имаме договор со претходното раководство дека ќе го прошириме опсегот, а нема да ја покачиме сумата. Тоа им беше во тој момент поважно. Опсегот е проширен така како што сме се договориле. Сега тие имаат ново барање. По новото барање сум апсолутно сигурна дека ќе најдеме некаква решение и мислам дека сме блиску до изнаоѓање на решението. Им понудивме ваучерски систем сличен на оној во Словенија, што беше барање на претходното раководство. Дури мислам дека нешто слично има и во некои покраини во Германија или се извинувам во други западноевропски земји – нагласи таа.
Патем појасни дека тие тој ваучер ќе можат да го користат во провајдери за храна – сендвичари, пекари, ресторани кои ќе бидат соодветни за нив, за да ги користат средствата како субвенција за храна, а не за цигари, алкохол и други нивни потреби, оти законот е за субвенција на оброк, на еден оброк.
– Дополнително би сакала да кажам дека имаме двојно субвенционирање на оброкот, затоа што студентите кои се сместени во студентски домови веќе имаат храна, но во ред е, ние сакаме да ги задоволиме потребите на нашите млади кои во иднина ја водат оваа држава и ќе се договараме и понатаму со нив. Ќе видиме до кое решение ќе дојдеме и штом дојдеме до некаква решение, ќе бидете информирани – додаде Јаневска.
Таа потврди дека ќе имаат денеска средба со премиерот и студентите.
Осврнувајќи се на барањата за бесплатен јавен и меѓуградски превоз, Јаневска рече дека јавниот превоз не е во надлежност на Министерството за образование и наука. Таа додаде дека за меѓуградскиот превоз во моментов нема законска можност, но дека ова прашање може да се разгледува во иднина, во консултација со студентите.
-Превозот како превоз и состојбата во државата не се во ингеренциите на Министерството за образование и наука. Има друго министерство за тоа и има локална самоуправа која претпоставувам според потребите и го решава превозот. Навистина не сакам да дадам изјава во која немам никаква ингеренција ниту сум доволно запознаена за тоа. Во однос на барањата на студентите за меѓуградски превоз, немаме законска можност. Тоа би требало да биде нешто ново што треба да го сработиме во иднина, повторно заедно со нив. И откако ќе го решиме студентскиот оброк ќе поразговараме и за тоа – истакна Јаневкса, одговарајќи на новинарско прашање.
