Почнува реконструкцијата на Клиниката за гинекологија и акушерство, потврди премиерот Христијан Мицкоски по отпочнувањето на работите во клиниката, заблагодувајќи им се на чинителите во здравството и на здравствените работници за, како што вели, натчовечките напори и за тоа што го прават за граѓаните.
Премиерот најави дека Владата ќе продолжи со инвестиции во здравството и рече дека буџетот на Фондот за здравство е зголемен за 18 милијарди денари во споредба со годините на ковид-кризата.
– Дали е доволно? Никогаш не е доволно. Но, ако имате близу 900 милиони евра буџет, тогаш тоа е нешто што е значајно, бидејќи 53 милијарди денари е буџетот.
Премиерот најави дека инвестициите би можеле да кулминираат со изградбата на голем Клинички центар во Скопје.
– Дел од проектот, кој што ќе биде спроведен заедно со Владата на Обединетото Кралство, ќе биде токму фокусиран на здравството и којшто очекувам, нормално, доколку условите се поволни да кулминира со изградба на конечно, посакуваниот голем Клинички центар во Скопје.
Мицкоски нагласи и дека неодамна се зголемиле платите и за медицинскиот персонал и за техничкиот медицински персонал, за докторите.
– Така и ќе продолжиме, имаме една динамика која што е утврдена.
Исто така, во одговор на новинарско прашање во врска со проектот за изградба или доградба на нови базени пред доаѓањето на летната сезона, премиерот информираше дека се очекува 6 базени да бидат завршени до јуни и уште еден наесен.
Со 27 милиони денари (околу 440 илјади евра) ќе се прави современ, модерен ин витро центар, најави денеска директорката на Клиниката за гинекологија и акушерство (ГАК), д-р Ирена Алексиоска-Папестиев.
„ГАК секогаш ги воведувала најновите современи техники, и дијагностички и терапевтски. Во 2000 кај нас е направено првото ин витро и е родено првото ин витро бебе. За жал, 4 години немаше ин витро на нашата Клиника, но од ноември 2024 е почнато повторно да се работи. Во програмата на Владата и Министерството за здравство се одобрени 27 милиони денари за осовременувње на застарената опрема која 15 години не е обновена и се надевам дека по завршувањето на овој проект повторно ќе можеме да ги следиме светските трендови. Тоа е исклучително важно за држава како нашата затоа што за жал на сите ни е јасно дека наталитетот ни е во опаѓање“, рече директорката.
Алексиоска-Папестиев и премиерот Христијан Мицкоски денеска ја најавија реконструкцијата на Клиниката, од 29 милиони денари (околу 470 илјади евра), која ќе биде реализирана до крајот на годината. Според најавите, со овие пари ќе има реконструкција и реновирање на платото пред Клиниката, на чекалните, амбулантите, лабораториите и на специјалистичките кабинети.
