Бугарскиот премиер Румен Радев денеска изјави дека телефонски разговарал со американскиот претседател Доналд Трамп и дека го покренал прашањето за безвизно патување на бугарските државјани во САД, објави „Ројтерс“.
— Во разговорот со американскиот претседател, настојчиво го покренав прашањето за укинување на американските визи за бугарските граѓани и очекувам ова прашање итно да биде разгледано — рече Радев пред да претседава со седница на владата.
Бугарија, која е членка на НАТО, е домаќин на американски воени авиони во главниот град Софија. Државата соопшти дека повеќе од десет американски авиони имаат дозвола да транзитираат низ бугарскиот воздушен простор и да слетуваат во Софија за полнење гориво до крајот на мај.
Радев изјави дека разговарал и со американскиот секретар за одбрана Пит Хегсет и дека очекува барање американските воени авиони да останат во Софија и по мај.
Радев извојува убедлива победа на парламентарните избори на 19 април.
Некои ја оценија неговата кампања како наклонета кон Кремљ бидејќи изразуваше загриженост за влегувањето на Бугарија во еврозоната и за воената поддршка за Украина.
Радев негира дека е проруско ориентиран и вели дека ќе го следи европскиот пат, а веќе се сретнал и со германскиот канцелар Фридрих Мерц.
