Денеска во тетовскиот суд беше изречена пресудата за пожарот во модуларната болница во Тетово во која изгореа 14 луѓе. Според пресудата поранешниот директор на тетовската болница Флорин Бесими и поранешниот економски директор на болницата Артан Етеми беа прогласени за виновни за пожарот во тетовската модуларна болница и добија условна казна од една година и шест месеци, додека докторот Бобан Вучевски е ослободен од обвинение, односно судот не пронајде вина кај него.
Судијата во тетовскиот суд пресуди и тетовската болница да плати оштета од милион денари.
Судењето за пожарот што се случи на 8 септември 2021 кога животите ги загубија 14 луѓе, а десетина беа повредени, почна на 7 декември 2022 откако од септември 2022 до тогаш судскиот процес беше неколку пати одложуван.
Поранешните директори, Флорин Бесими и Артан Етеми се теретат за кривично дело „тешки дела против општата сигурност“, додека докторот Бобан Вучевски за „непостапување според здравствени прописи за време на епидемија“. Клиничката болница како правно лице се терети за две кривични дела, прво за „предизвикување општа опасност“ и за „непостапување според здравствени прописи за време на епидемија“.
Тие на почетокот на судењето истакнаа дека го разбираат обвинението, но дека не чувствуваат вина.
