Самостојната изложба на проф. м-р Стефан Јакимовски со наслов „Графички приказни – Визуелни приказни раскажани преку ликовната и применета уметност” ќе биде отворена во изложбениот салон на НУ Центар за култура „Трајко Прокопиев” – Куманово на 18 Мај (четврток) 2023 година во 19:30 часот.
Стефан Јакимовски има завршено средно училиште за применета уметност (УПУ “Лазар Личеновски” ) – Скопје оддел применета графика. По завршување на средното образование се запишува на Факултетот за ликовни уметности ФЛУ-Скопје – Универзитет Св. Кирил и Методиј, на оддел графика (насока графички дизајн) во класата на проф. м-р Димитар Малиданов. Постдипломски студии завршува во 2008 година, кај истиот професор, на тема Мултимедијален пристап во графиката (Графичкиот израз и мултимедијалното дизајнирање и проткајување на ликовните медиуми). Активен член е на Друштвото на ликовни уметници на Македонија-ДЛУМ, Друштвото на ликовни уметници на Куманово-ДЛУК, Фото кино клуб “Козјак” и Интернационалната дизајнерска асоцијација CEIDA(ЦЕИДА).
Стефан е уметник кој со својот приказ и експресија на делата го поместува реалното и имагинарното и постојано е во потрага по нови прикази на своите дела кои ги следи и вклопува во модерните текови. Разбирливи, едноставни, а сепак совршено вклопени во една уметничка целина. Стефан Јакимовски е редовен професор на Факултетот за дизајн и мултимедија при АУЕ-ФОН-Универзитет и е основач на катедрата за графички дизајн на истиот факултет. По покана одржува гостински предавања на Балкански универзитет-Скопје, Универзитет Мајка Тереза – Скопје, но и научно-истражувачка посета на IT-University of Chopenhagen-Данска оддел за дигитален дизајн. Предава предмети од областа на графиката, графичкиот дизајн, типографија, плакат, корпоративна комуникација и друго. Автор е на многу графички решенија и учесник на меѓународни конкурси, симпозиуми и изложби. Јакимовски е член на повеќе стручни жири комисии, рецезент на книги за средно стручно образование и ментор на наставни и вон наставни проекти. Јакимовски за својата досегашна работа има добиено многу награди и признанија.
