Премиерот Христијан Мицкоски денеска од Штип рече дека судиите и обвинителите не ги заслужуваат ниту сегашните плати, а камо ли да им бидат зголемени, како што бараат од ЕУ.
Тој нагласи дека чувствува мачнина кога слуша за зголемување на платите на судиите и обвинителите, со оглед дека имаат само 2% доверба од граѓаните.
„Моите ставови за судството и обвинителството се многупати кажани, и секогаш кога ќе зборуваат зошто доцниме во законите за реформи во судството, основната суштина е зголемување на буџетот, а со тоа и зголемување на платите на судиите и обвинителите, кои имаат рејтинг 2%, а се бара зголемување на платите 0,8% од БДП на судиите и 0,5% на обвинителите. Секогаш чувствувам мачнина, затоа што сега и овие плати не ги заслужуваат“, изјави Мицкоски.
Тој рече дека кога „таканаречените експерти излегуваат во јавноста и ја критикуваат Владата за застој на реформите во обвинителството и судството“, на граѓаните треба да им се објасни што е суштинската реформа. Како што кажа Мицкоски, во делот на законите за судиите и за обвинителите не се бараат некои реформи, туку единствено да се зголемат нивните плати.
Според Мицкоски не е проблемот во зголемувањето на платите, туку дека тоа треба да се заслужи.
Обвинителката за врски на Македонија во Европравда, Ленче Ристоска, вчера го демантираше Мицкоски и рече дека никогаш не зела повисока плата од редовната, платата не ѝ ја одредува државниот обвинител со Правилник и е единствениот обвинител кој работи од сопствената држава. Нејзината реакција следува откако Мицкоски на брифинг со новинарите во петокот тврдеше дека имало пракса претставникот во Европравда да прима ненормално висока плата.
