Осумнаесет патници се повредени во пожар што избувна во авион на „Рајанер“ на аеродромот Палма де Мајорка пред неговото закажано полетување.
Инцидентот се случил непосредно пред полноќ, кога ненадеен пожар предизвикал паника кај патниците, објави „Билд“. Многумина побрзале да избегаат од авионот, некои скокајќи од крилото на авионот.
Според првичните извештаи, шест повредени лица морале да бидат однесени во болница. Тројца биле примени во приватната клиника
„Ротгер“ во Палма де Мајорка, додека тројца други биле префрлени во болницата „Киронсалуд Палмпланас“, која се наоѓа во истиот град.
Иако пожарникарите и полицијата брзо пристигнале на местото на несреќата, причината за пожарот сè уште е непозната. Исто така, не е потврдено кон која дестинација требало да полета авионот пред да избувне пожарот, пренесува Танјуг.
