Анкетите предвидуваат дека владејачката конзервативна партија Неа демократија ќе освои најмногу гласови, но поради промените во изборниот систем во земјата веројатно нема да добие доволно за апсолутно мнозинство.
Избирачките места беа отворени во шест часот наутро (7 часот по грчко време), а ќе се затворат во 18 часот. Право на глас имаат нешто помалку од 10 милиони Грци. Во 21 часот ќе бидат објавени првите излезни анкети на шест агенции за истражување на јавното мислење.
Неа демократија на чело со премиерот Киријакос Мицотакис, според анкетите, добива меѓу 31 и 38 отсто од гласовите, а на второ место е левичарската опозициска партија Сириза, која би требало да има 4-7 процентни поени помалку. Анкетните агенции велат дека на партиите им требаат повеќе од 45 отсто од гласовите за да победат целосно.
Кризата за трошоците на животот беше централна тема на изборната кампања, а партиите се обидоа да ги придобијат гласачите со ветувања дека ќе ја зголемат минималната плата и ќе отворат работни места. Растот на цените имаше интензивно влијание врз Грците, чиј животен стандард беше значително нарушен за време на десетгодишната должничка криза.
Нејасниот исход од изборите ќе доведе до неколкудневни преговори меѓу политичките партии за да се најде заеднички јазик и кохабитација во владата.
– Денешниот резултат е референдум или за политичка стабилност или за воведување влада без кормило – пишува грчкиот весник „Прото тема“ во насловот на уводникот.
Доколку ниту една партија не победи, грчката претседателка Катерина Сакеларопулу на трите партии со најдобри резултати ќе им даде тридневен мандат за секоја да се обиде да формира влада.
Доколку ниту една партија не успее, тогаш Сакеларопулу ќе назначи привремена влада која ќе ја води земјата до следните избори, околу еден месец подоцна.
