Министерството за внатрешни работи информира дека утринава на граничниот премин Блаце за влез во Македонија се пријавил екс директорот на „Државна лотарија“, обвинет за проневера во службата.
-Денеска (09.09.2026) во 05:35 часот на ГП Долно Блаце за влез во РСМ се пријави Перпарим Бајрами (33), баран со меѓународна потерница по наредба од ОЈО Скопје бр.XVII KO бр.4232/24 од 17.12.2024 година. Лицето е лишено од слобода и спроведено во Казнено поправната установа Затвор Скопје, посочуваат од МВР.
По Бајрами беше распишана мерка „апси“ по барање на СМПС – Одделение за потраги, согласно член 354 став 5 од Кривичниот законик.
Со ова, по Артан Груби, уште едно лице по кое се трагаше е ставено на располагање на органите на прогонот.
