Русија ги поддржува Србите во Косово и верува дека нивните законски права и интереси мора да бидат заштитени, изјави портпаролот на Кремљ, Дмитриј Песков. Тој рече и дека Москва со загриженост ги следи немирите на Косово.
Неколку десетици војници на КФОР, силите на меѓународната заедница под раководство на НАТО, беа повредени во понеделникот попладне во судир со српски демонстранти во општина Звечан на северот на Косово. Српските демонстранти, меѓу кои има и неколку десетици повредени, се спротивставија на доаѓањето на градоначалниците Албанци во општините по изборите, кои беа бојкотирани од Србите.
„Безусловно ги поддржуваме Србија и Србите… Сметаме дека мора да се почитуваат сите законски права и интереси на косовските Срби“, рече Песков на дневната прес-конференција, додавајќи дека не смее да има простор за „провокативни дејствија“.
НАТО во вторникот соопшти дека ќе испрати 700 дополнителни војници во Косово и ќе стави уште еден баталјон во состојба на готовност додека Србите продолжуваат да протестираат против новите градоначалници. НАТО веќе има околу 4.000 војници во Косово.
Нови протести на српското малцинство на Косово избија во средата на северот на земјата, а учесниците на собирите во Звечан, Лепосавиќ и Зубин Поток повикаа на повлекување на полицијата и локалните градоначалници, јавува ДПА. Ситуацијата се уште е мирна, пренесува порталот koha.net, пренесува dpa.
Полските војници во средата чуваа стража пред градското собрание во Звечан, додека демонстрантите од другата страна на оградата го развиорија големото српско знаме со аплаузи и свирежи. Српскиот претседател Александар Вучиќ ја ставил војската во целосна борбена готовност и им наредил на војниците да се приближат до границата.
Русија не ја признава независноста на Косово и го блокираше обидот на Косово да стане членка на ОН.
Макрон ја истакна „одговорноста на косовските власти“
Францускиот претседател Емануел Макрон во средата предупреди на „одговорноста на косовските власти“ за влошување на ситуацијата во Косово, по жестоките судири во кои беа повредени 30 војници на НАТО.
„Очигледно е дека постои одговорност на косовските власти во сегашната ситуација и дека договорот кој беше важен и беше потпишан пред само неколку недели не се почитува“, рече Макрон на прес-конференција во Братислава, Словачка.
„Јасно им кажавме на косовските власти дека распишувањето на изборите е грешка“, рече Макрон.
Францускиот претседател ги обвинува косовските лидери за непочитување на договорот со кој заврши процесот започнат со европско посредништво, со посебно учество на чешките преговарачи, германскиот канцелар Олаф Шолц, високиот претставник на ЕУ за надворешна политика и него самиот.
