Четврти ден со ред има дојави за поставени бомби во училишта низ Македонија. Утрово уште на првиот училиштен час, во 8 часот, на службениот мејл на некои училишта во Скопје е примена закана за поставена бомба.
Во тек е евакуација на учениците, наставниците и вработените во гимназијата „Никола Карев, а информации има и за десетина други училишта во главниот град.
Вчера дури од 120 училишта во Скопје имаше пријави до МВР за примени закани, по што е утврдено дека станува збор за лажни дојави, соопшти Министерството за внатрешни работи.
Закани за бомби имаше и минатата недела, а наставата е постојано во прекин уште од октоври месец, поради што минатата недела Министерството за образование со итен допис до градоначалниците и директорите на училиштата препорача во денови кога наставата се прекинува, учениците да одат дома и да се вклучат онлајн со цел да не се загуби многу од наставната програма.
