На Дигиталниот самит на Западен Балкан, министерот за дигитална трансформација, Стефан Андоновски, ја претстави новата национална супер апликација м.Услуги (m.Uslugi), нарекувајќи ја „револуција на умот и делувањето“. Супер апликација значи дека апликацијата ќе ги содржи сите услуги кои државата ги нуди на граѓаните, со можност за складирање на електронски документи, најкористени услуги, потсетник за истекување на рокови и електронско сандаче.
Ова е една апликација што ја носи државата на дланка – една апликација за сите важни документи, една апликација за сѐ. м.Услуги е новата и единствена супер-апликација, едноставна за симнување, прелистување, зачленување и користење“, изјави Андоновски.
Апликацијата м.Услуги овозможува граѓаните да ги имаат своите најважни документи меѓу кои и личната карта, директно на својот мобилен телефон, со целосна безбедност и контрола врз сопствените податоци. Преку ултра безбеден QR код се овозможува споделување информации без ризик, со користење на енкрипција со највисоки безбедносни стандарди.
