ЕВРОПСКАТА Агенција за лекови (ЕМА) не е задоволна од планот што го разгледува градот Амстердам за формирање нов „еротски центар“ во близина на неговото седиште, соопшти во вторникот регулаторот за лекови.
Амстердам со години размислуваше да ја премести легалната проституција од својот историски кварт на црвените фенерим а во февруари објави три можни локации.
Две се во близина на новата зграда на ЕМА, која се наоѓа недалеку од големите хотели и финансиската област на градот.
„Многу сме загрижени“
ЕМА го пресели своето седиште во Амстердам во 2019 година, напуштајќи го Лондон откако Британија ја напушти Европската унија.
Во соопштението, агенцијата рече дека е „многу загрижена“ за плановите за центарот, кој се очекува да вклучува околу 100 „работни простори“ за сексуалните работници, како и барови и забава.
Преместувањето на квартот на црвените фенери беше мотивирано од загриженоста за непријатност, трговија со дрога и пијанство, соопшти ЕМА.
„Лоцирањето на еротски центар во непосредна близина на зградата на ЕМА веројатно ќе ги донесе истите негативни влијанија врз соседната област“, тврди таа.
Градоначалникот: Сакам да биде еротски центар со стил
Градоначалничката на Амстердам, Фемке Халсема, сака да изгради повеќекатен „еротски центар“, а од архитектите е побарано да дизајнираат зграда која ќе содржи простории за секс услуги, како и барови и забавни центри.
Халсема вели дека сака да ја подобри состојбата на сексуалните работници и да го намали влијанието на организираниот криминал.
„Се надевам дека е можно да се создаде еротски центар со стил, а не место каде што се собираат само ситни криминалци и најранливите жени“, изјави таа за весникот „Обсервер“. Халсема додала дека е свесна оти многу жители нема да сакаат да биде во нивна близина.
Проституцијата е легална во Холандија од 2000 година.
Агенцијата соопшти дека е загрижена за безбедноста на нејзиниот персонал и посетителите и истакна дека има договор со холандската влада кој гарантира „безбедност и мир“ во нејзините канцеларии.
Проституцијата во Холандија е легална од 2000 година, а пред тоа со децении се толерирала во квартот на црвено светло.
Но, соседството се менува во последните години бидејќи жителите се жалат на прекумерен туризам. Во февруари, градот објави план за забрана на пушење канабис во областа на црвено светло.
